Njerëzit duket se ndahen përgjysmë kur vjen puna te kuzhina aziatike, por gjithashtu, ata që e kundërshtojnë këtë kuzhinë me mish e me shpirt, nuk duket se e kanë provuar ndonjëherë atë. Gjithmonë habitem se si mund ta përflasë një person një ushqim të caktuar, pa i dhënë një shans më parë.
Funksionon si me përgojimin e njerëzve, edhe kjo punë.
Për sot do të ndryshojmë mendime të gabuara për kuzhinën aziatike, duke dhënë recetën e pulës së thartë dhe të ëmbël, pjatë tradicionale kineze.
Përbërësit
450 gr gjoks pule, prerë në kuba mesatare
65 gr niseshte misri
2 vezë të rrahura lehtë
2 lugë gjelle vaj perimesh
2 speca, të prerë në rripa
2 lugë gjelle salcë soje
100 gr mjaltë
60 gr ketchup
125 ml uthull molle
2 thelpinj hudhër të shtypur
Kripë, piper
Oriz i bardhë për shërbim
Përgatitja
- Lyeni copat e pulës në kripë e piper, më pas zhytini në niseshte misri dhe shkundini nga niseshteja e tepërt. Zhytini copat te vezët e rrahura.
- Hidhni vajin në tigan dhe skuqini copat e pulës për 4 minuta, derisa të bëhen kafe në çdo anë. Fusni dhe specat dhe skuqini me pulën derisa të zbuten.
- Ndërkohë, përgatisni salcën. Përzieni ketchup-in, salcën e sojes, uthullën e mollës, mjaltin, hudhrën derisa të njëtrajtësohet. Hidheni salcën në tigan me pulën. Ziejini bashkë për 5 minuta, derisa salca të trashet dhe pula të jetë gatuar tej për tej.
- Shërbejeni të ngrohtë me oriz. Shtoni fara susami për shije.
Show Comments (0)