Kajmaklia nuk është gjë tjetër veçse një kek-mafishe, i lehtë dhe i butë, i përshtatshëm për t’i dhënë formë. Njihet zakonisht me emrin “meringue roll”, apo dhe “Pavlova roll”.
Për mbushjen e kajmaklies sot zgjodhëm luleshtrydhe, por mund të përdorni edhe të tjera fruta sipas dëshirës tuaj, si banane, kivi, mjedra, apo mund të bëni edhe një miks të tyre, si një miks frutash tropikale. Kajmakliet me reçel frut pasioni kanë sukses gjithashtu.
Përgatitja e saj nuk kërkon mund, pasi zëreni se jeni duke përgatitur mafishe. Sigurohuni që t’i rrihni mirë përbërësit, dhe rrahja e të bardhave të vezës në borë ka rëndësi.
Përbërësit (për 4 veta)
3 të bardha vezësh
150 gr sheqer
1 lugë sheqer pluhur
1 lugë miell
300 ml ajkë
disa kokrra luleshtrydhe, të prera në feta, aq sa për të mbuluar sipërfaqen e kajmaklies, ose fruta të tjera/miks frutash
Përgatitja
- Ngrohni furrën në 180 gradë dhe lyeni një tavë të përshtatshme (26×16 cm) me vaj, dhe visheni me letër furre.
- Rrihni të bardhat e vezëve me sheqer derisa të bëhen si borë. Shtoni brenda edhe sheqerin pluhur me miellin, rrihini sërish derisa përbërësit të kombinohen mirë.
- Vendoseni kajmaklien në tavë dhe piqeni në furrë për 30 minuta, derisa të fillojë të marrë ngjyrë. Hiqeni nga furra dhe lëreni të ftohet. Ktheni pastaj kajmaklien në një beze dhe hiqeni nga letra e furrës.
- Rrihni ajkën mirë, lyeni me të kajmalien dhe zbukurojeni me luleshtrydhet. Rrotullojeni kajmaklien si rul dhe vendoseni në një tabaka.
Ju bëftë mirë!
Show Comments (0)